〈旺角〉Foodo。出色自家製手工意大利粉

0

從友人猛烈南瓜在飯桌得知旺角女人街呢間主打手工意粉嘅小店 Foodo
今晚返屋企途中剛巧路經此地,反正助手唔鍾意食意粉,難得一丁友不如就喺度食埋晚飯。

店舖裝潢走簡約路線,由兩位 TVB 女藝人葉婷芝同林秀怡開設。
向來熱愛煮食嘅阿芝負責製作食物,秀怡拍完劇都會返舖頭喺樓面幫手。

先黎個鮮奶甘荀蘋果忌廉湯,香甜滑溜嘅甘荀湯中帶點蘋果清香,隱約仲帶啲洋蔥嘅香氣?
可能有人會嫌佢比坊間普遍嘅西湯偏淡身,但係正合我意,慢慢令人開胃。

同樣係日日新鮮手製嘅麵包,經過長時間發酵,非常鬆軟有彈性。
外層微脆帶鹹香,內層細緻綿密帶柔潤質感,更富麵粉香氣,十分討喜。

雖然佢地自家製醃肉似乎更有特色,但我最後都係被隻鳳尾虎蝦吸引左。

特別推介嘅魷魚意粉都要留待下次再試啦。

新鮮手工製意粉使用日本麵粉同雞蛋即日製造,質感一流,爽口中帶少少煙韌彈牙。
仲極為幼滑,完全冇坊間現成意粉煮出黎剩餘嘅黏稠粉團感,亦更有濃郁雞蛋味。

選用柔嫩嘅菠菜葉作為配菜,同整體滑溜溜嘅口感配合。
鮮蝦嘅胡椒味略嫌有啲重,但從淡口嘅忌廉奶香中加添香口惹味都算係正好。

食完濃濃嘅虎蝦同醬汁,呷一口自家製水果冰茶頓然倍覺清新。
果茶帶淡淡微甘,完全冇甜膩感,富天然蘋果香氣,清爽又解渴。

最後忍唔住試埋個甜品,選擇唔多,但所謂貴精不貴多嘛。

嗌左個焦糖脆脆蛋糕,內層海綿蛋糕濕潤鬆軟,外層忌廉都算幼滑。
上桌前灑上堆得滿滿嘅焦糖脆粒,咬落脆卜卜又唔痴牙,帶有濃濃焦糖醇香,
蛋糕底應該係故意整得清淡去平衡脆脆嘅甜膩感,整體都唔錯。

但係對我黎講都係甜左啲,始終都係意粉比較有驚喜得多。

午市意粉連飲品都係 $55 起,包埋飲品,另加 $12 有湯,仲有日式飯類可以選擇;
而晚市就 $81 起,包埋飲品,另加 $18 有湯同麵包,仲有幾款薄餅選擇。

呢度全日免收加一,認真估唔到喺旺角鬧市以呢個價錢食到高質素嘅手工製食物,
看似簡單,但全部都係花時間嘅心機菜,真心算超值,值得再黎!

同埋店長好好笑容,服務好,又主動關注對食物意見,客人當然食得開心。

要留意返呢度小店經營,店長如果病左、有要事、旅遊就會休息唔開,
記得留意佢地嘅 Facebook 或 Instagram 專頁,以免白行一趟啦。

—————————————
Foodo
地址:香港九龍旺角通菜街 1A-1L 號威達商業大廈地下 C 號舖


發表迴響