〈西貢〉(已結業)Ice Mango Cafe。特色漢堡與豐盛漁夫籃

0

氣溫回暖一段日子,又好彩未至於太熱,週末多返啲人走入西貢,搭船出去玩下,買下海鮮。
喺西貢海旁,好多人以為全部都係海鮮酒樓,但其實行多幾步,都有唔少特色野食架。

好似幾個月前,就有呢間 Ice Mango Cafe 開業,我呢個西貢街坊當然留意到,但近日先得閒拜會一下。
餐廳對出就係無敵大海景,停泊左好多艇家嘅船,坐室外望住個海食飯,環境都唔錯,當然室內都有座位啦。

【漁夫籃 Fisherman’s Basket】(港幣 $75)

漁夫籃賣相好吸引,木箱仲係我鍾意嘅淺藍色。裡面有一大條炸魚,兩隻炸蝦、炸蟹柳、魷魚圈同埋薯條。

炸魚都幾厚肉,炸漿又薄又鬆脆又香口,唔錯喎;只係略嫌條魚濕左少少啦,但勝在嫩滑又夠魚肉味。
炸蝦都好大隻,肉質爽脆,魷魚圈都好惹味,有驚喜嘅竟然係炸蟹柳,原來脆脆地咬落去帶絲嘅質感幾得意。

【鮮蘑菇芝士漢堡 MOO BIT Beef Burger】(港幣 $68)

聽講呢度嘅漢堡包都幾出名,用上澳洲漢堡嘅做法,麵包先搽上牛油再烘至外脆內軟,仲聞到陣陣麵粉香。

漢堡扒係自家製,牛肉味極濃,厚身啖啖肉,燒到帶有焦香,夾埋上面塊半溶化嘅芝士,非常惹味啊。

底下仲有大量清甜又惹味嘅洋蔥,番茄仔仲好多汁,生菜又爽脆。細蘑菇粒唔算十分多,但都夠晒滋味。

【檸檬柚子茶】(港幣 $27)、【檸檬茶】(港幣 $18)

飲品選擇都幾多,有好多款咖啡、朱古力、冰紅茶類,熱茶都有好多選擇,更有花茶及果茶,可以慢慢嘆。

總括黎講呢度野食質素幾好,以呢個價錢仲好抵食,望住海景食野就更加唔錯,入開嚟不如嚟呢度食飯啦。

—————————————
芒果冰 Ice Mango Cafe
地址:香港新界西貢海傍街 47 號地下


發表迴響