〈銅鑼灣〉時代廣場變身迪士尼.彼思《怪獸大學》

0

隨住迪士尼.彼思《怪獸大學》上映,香港時代廣場都化身成為《怪獸大學》校園。展覽其實已開放咗一排,分別聽日同後日就完結喇,呢排太忙…拖到而家先分享下 =P

時代廣場露天廣場:21/6-16/7/2013 (10am – 10pm)
時代廣場二樓大堂:21/6-17/7/2013 (10am – 10pm)

準備好開學未?我哋入去喇!

入到校園第一時間緊係要辦返張學生證先…然後旁邊就係「驚嚇學院」喇!

我又要跟埋大眼仔(米高華素基)一齊上大學!!(明明大學畢業咗好幾年…)

返學途中遇到大眼仔嘅死對頭兼未來好拍擋──毛毛(占士蘇利雲)著住校褸好有型!

仲點少得 啱 Key (OK──OOZMA KAPPA)會嘅成員阿拱同埋向右同向左!

其實淋支支(史葛史基寶)超可愛啊!更唔少得「啱Key會」創辦人唐叔(唐卡頓)。

連第一日點跑都返學遲到嘅蝸牛都有…哈哈。可惜冇斯克薄院長啦,唔通因為太恐怖?

校園嘅柱上貼滿各式各樣嘅廣告招生啊!有為大家頭上嘅角磨尖嘅服務 @@” 仲有怪獸貼咗張尋頭廣告,邊個搵得返佢個頭就還返去 13 號房 @@” 仲有怪獸話唔見咗一隻眼球 @@” 另外適逢開學,各學會就緊係要貼廣告招收新生啦。

全校最有勢力嘅學會菁嚇會/吼叫兄弟會(Roar Omega Roar),精英先有資格加入。仲有變色龍(蘭度寶基司)同埋搞「驚嚇全運會」嘅怪獸大學學生會副會長!

超搞笑嘅美術學會都招生呀,唔識美術都可以好似佢咁畫到幅抽象靚畫 XD

自己同自己都要拗一餐嘅辯論學會…好熱鬧嘛!仲有好可怕嘅圖書館館長!

上到時代廣場二樓,一邊係怪獸大學宿舍,另一邊係驚嚇學院各個課室。

大眼仔喺自己間房對住塊鏡不斷練習嚇人…但點嚇都係勁可愛 =P

全部傢俱擺放同電影入面完全一樣架!

唔少得一開場就搞到一鑊泡嘅豬嘜,超可愛!連怪獸大學嘅手機遊戲都係以佢做中心。

奈特教授同 A113 演講廳,就係各位怪獸喺驚嚇學院上課嘅地方!

連接到人類小朋友房間嘅傳送門,以專用能量收集桶,測試及收集驚嚇能量。

開放期間可以走入去影相架,不過要排隊勁耐…又多人…反而剛封場時仲好影!

仲有一塊牆放滿怪獸大學同怪獸公司時代嘅設計原稿。

如果 Miss 咗呢個展覽都唔洗太失望嘅,仲可以去迪士尼樂園裡面果個更大丫。仲有當然記得睇埋《怪獸大學》電影啦!(聽說最尾字幕 Run 完著左燈後仲有嘢睇啊)


發表迴響