〈灣仔〉MOMOJEIN。新推出韓式周末半自助 Brunch

0

位於灣仔 QRE 樓上嘅 MOMOJEIN,喺上年年尾開業時嚟過食晚飯,對呢度嘅食物好感度都幾高。
早排週末再次嚟到呢度,但呢次唔係食晚飯,而係試下佢地新出嘅韓式半自助 Brunch。

呢個 Brunch 逢星期六日推出,供應時間為正午 12 點至下午 2 點 30 分,成人每位 $350,小童 $175。
另加 $120 仲可以喺兩個鐘頭內 Free Flow 韓國米酒、啤酒及燒酒 Sangria,加多 $50 可以飲埋有汽酒。

韓國總廚 Lim Hee Won 繼續坐鎮,開店至今都經常見佢出出入入,上至下廚下至搬貨驗貨都親力親為…
可能上得韓國電視台烹飪節目多,亦不時喺電視台亮相,佢見親有人影相就會好自然擺晒甫士搏被影 XD
佢份人都好搞笑又親民,見到佢不妨撩佢傾下計,幾歡樂架 XD

而呢度個半自助餐,除左外面自助任拎嘅湯、前菜及小食等等,主菜係六選一嘅,另外仲包埋份甜品拼盤。

【韓燒牛肋肉 Grilled Kalbi】(另加港幣 $50)

韓國食物通常離不開牛肉,主菜韓燒牛肋肉選用上等嘅美國牛,牛肉味都幾香,咬落滑嫩,肉汁與油份足。
用左秘製韓式烤汁調味,味道甜甜地,再食啖微酸嘅芫茜蘿蔔芝麻沙律,醒胃又解膩。

【燒鯧魚 Grilled Butterfish】

呢條燒鯧魚都係驚喜之作,用鯧魚嘅頭尾,混合少少中式做法,加入豉油、薑、蔥、辣椒粉同蘿蔔。
外層薄而脆身又香口,中間魚肉鮮味足又夠滑,都算厚身,份量係咁多款主菜中比較抵食。

【韓式烤牛肉 Grilled Bulgogi】

之前喺晚餐食過幾唔錯嘅韓式網烤牛肉,可以喺晏晝都有幾好啊。彈牙嘅牛頸肉充滿蒜香,同樣惹味。

【香燒羊排 Lamb Chop】(另加港幣 $80)

澳洲羊排用韓式大醬、乳酪同香草醃過,搽上米糖漿再碳燒至焦香,配搭特別,而羊肉羶味輕,容易入口。

【鮑魚石頭鍋飯 Abalone Stonepot Rice】

韓國傳統石頭鍋飯,我唔記得左影相就同朋友分左…本身有幾片鮑魚同冬菇,加水仲可以煮成粥。
不過咁多樣主菜裡面,我嫌呢道味道淡左啲,米飯偏濕,除左海帶味,其他食材味都唔夠,有啲失望啦。

【韓式慢煮豬腩肉 Pork Belly】

炆左成個鐘頭嘅豬腩肉,辣豆醬、芝麻同洋蔥味非常香,豬肉咬落柔軟又入味,仲唔太肥膩添。

【Salmon】、【Smoked Salmon】

等啲主菜煮好送上嚟之前,可以先出外面拎啲小食醫下肚。總廚 Lim 已經喺香港生活左好一段時間,
知道唔少香港人鍾意食三文魚刺身,所以特別加入幾道三文魚菜式。而佢亦以香菇同醃菜調製韓式醬汁,
更加突出魚肉鮮甜味,又帶有韓國特色。其實三文魚刺身本身味道有點淡,但配埋個酸嘅醬汁都幾醒胃。

旁邊其實仲有一碟蘋果木煙燻三文魚,不過好快被人拎晒,要等…等下等下我又錯過左之後幾輪…

【Mixed Rice – Salmon & Salted Squid】

另一道三文魚菜色,以酸甜醬汁醃製過,下面用韓式醬汁煮過嘅有啲似薏米,辣辣地又煙韌,幾有趣。

【Flying Fish Roe Shot】

飛魚子配鮑魚與海帶,充滿海洋風味,富有鹹香好醒胃。

【Salmon Kimbab】、【Spicy Pork Kimbab】

旁邊有兩款韓國飯卷,餡料分別係三文魚同泡菜豬肉,三文魚都係唔太夠味,泡菜豬肉香口得多。

【Green Salad with Black Sesame Yogurt Dressing & Yuzu Dressing】

再食啲新鮮蔬菜,感覺健康啲。

【Fresh Cabbage Kimchi】

韓式泡菜辣度剛剛好,非常開胃,大白菜咬落仲好爽脆,仲幾鮮甜添。

【Cucumber Kimchi】

另外仲有泡菜醃青瓜,鹹鹹酸酸,帶少少魚露香,又係另一番風味。

【Broccoli, Pollock Roe, Black Garlic Aioli】

明太子與西蘭花配黑蒜蛋黃醬,配搭都幾有特色,只係我麻麻地啲烚過頭腍到爛嘅西蘭花…

【Octopus & Spinach】

反而幾鍾意食呢個八爪魚菠菜,凍凍地,好清新,味道又唔會太單調。

【Asparagus & Dried Anchovy】

仲有露荀好好味!非常鮮嫩,咬落無渣,醬汁有奶香,夾埋鹹香又煙韌嘅鯷魚仔,非常夾!

【Fried Eggplant & Chorizo Doenjang】

我至愛嘅茄子呀!煎過嘅茄子,煮得夠腍又一啲都唔油喎,仲吸收到肉香。

【Japchae】

食韓國菜又點少得韓式炒粉絲,不過太飽肚喇…我只係淺嚐左一口。味道淡身,但質感都幾彈牙。

【Tteok Skewer】

而呢個真係……炸年糕好好味!炸年糕好好味!炸年糕好好味!(很重要所以要講三次)
據說老闆娘嘅媽媽喺尖沙咀韓國街賣自家製年糕(好似係),呢度就係用左媽媽親手整嘅貨色。
年糕超柔軟又煙韌~可以拉到好長都唔斷,仲幾好咬口。我地雖然食到好飽,都忍唔住再拎多幾條 XD

【Octopus Skewer】

八爪魚串燒都唔錯呢,非常厚身彈牙,但食落一啲都唔韌,仲吸收滿醬油味添。

【Rib Patty Mini Burger】

自家製漢堡扒用牛肋肉打成,整成迷你漢堡,賣相吸引。係我望住咁厚嘅麵包…冇咩意欲去食佢啫…

【Flowered Chive Pancake】、【Kimchi Pancake】

我幾鍾意食韓式煎餅,所以見到呢度有好開心。不過可能擺得耐左變凍,韭菜煎餅陣油味都幾勁…
泡菜煎餅就好好多,比較乾身,雖然已經唔太脆,但冇濕到腍,仲仍然香口。細細塊,仲可以過口癮唔怕滯。

【Chicken Wings】

韓國炸雞風潮未減退,呢度都有供應韓式炸雞翼。薑味都幾重,有少少甜,記得襯熱拎。

【Steamed Egg】

韓式蒸蛋睇落滑溜溜賣相都唔錯,不過匙羹一不落去就……硬到不唔到,放棄…希望只係一時失手。

【Ginseng Chicken & Shellfish Congee】

即叫即做嘅人參雞海鮮粥,人參味就唔多,雞味都有啲,蜆味反而最重,粥底就夠綿滑富米香。

【Steamed Vegetables】

旁邊竹籠裝住嘅時令蔬菜同雜菇,都係即叫即蒸。

【Seaweed Soup】

海帶湯味道有啲似中式紫菜肉丸湯,味道都 OK 嘅,都幾解渴。

【韓式甜品拼盤 Dessert Platter】

最後店員會送上一人一份甜品拼盤,每款甜品每人都有一件,呢度成個盤係三人嘅份量。

建議拿拿臨食左個棉花糖先,因為好快會溶晒…

韓式刨冰,撈埋綿滑軟糯香甜嘅紅豆,同埋豆粉,味道甜中帶微鹹都幾得意。

糖衣蕃薯粒好好味!即係拔絲蕃薯~糖衣脆身一咬即裂開,薄身唔黏牙,蕃薯仲非常香甜。

韓式甜品最常見嘅麻糬,夠晒煙韌~

當中亦有西式甜點,呢個朱古力 Brownie 裡面有果仁碎,咬落口感層次幾豐富。

仲有韓式紅豆糕,但佢鹹味都幾重,唔係個個食得慣。

最後食返幾款非常清甜嘅時令生果,解下飽滯感又解渴。

飲品方面,如果唔飲酒嘅話,梅子梳打同柚子梳打味道都唔錯,可以一試。

餐廳位於灣仔 QRE Plaza,鄰近地鐵站,地點方便易去,環境好寬敞舒適,最啱週末慢慢嘆世界。

人多的話仲有呢個私人角落,一大班朋友共聚,自成一角。

隨住季節及時令食材轉變,以上菜式都會不時變更,供應期亦有限。
可以一次過食到咁多款式嘅韓國美食都幾吸引,嚟食 Brunch 同晚飯都各有特色呢!

—————————————
MOMOJEIN
地址:香港灣仔皇后大道東 202 號 QRE Plaza 23 樓


發表迴響