〈銅鑼灣〉Sodam Chicken。出色炸雞與玩味特飲

0

韓風繼續吹唔停,韓國炸雞開完一間又一間未停過,直到早幾個月前,又有一間韓國炸雞店登陸香港。
喺韓國有 70 幾間分店嘅 Sodam Chicken,嚟到香港開首間分店,選址銅鑼灣耀華街百樂中心幾方便。

餐廳環境都幾唔錯,走年青路線,同韓國快餐店裝潢有啲唔同。

一邊係餐廳區,另一邊係酒吧區,供應韓國飲品之餘,仲有多款酒精及非酒精特飲。

【Sodam 韓式炸雞】(港幣 $168)

有如餐廳個名一樣,呢度嘅招牌菜係韓式炸雞,用上全隻雞拆件,份量都唔少。
除左原味配甜酸醬,仲有蜜糖芥末香蔥、雙重芝士、甜酸同埋濃蒜味道選擇。

試試招牌原味炸雞,有驚喜喎!皮薄鬆脆,非常香口,據說材料選用本地冰鮮白皮雞,
韓國品種味道同質感相似,保留韓國原有風味,雞肉唔肥仲好嫩滑多汁,點埋甜酸醬仲更加開胃添。

【芝士白汁年糕】(港幣 $120)

煙煙韌韌嘅芝士白汁年糕,充滿芝士同牛奶香,幾欣賞佢加左韓國泡菜點綴,帶微辣又平衡到濃膩感。

【Passionate Love】(港幣 $58)

招牌特飲分別有蘋果、提子及菊花蜜三款,特飲賣相好得意,勁大杯,好抵飲!
提子汽水本身入口都幾似有氣利賓納,但攪溶左條水果味雪條之後,混合唔同果香,都幾特別。

【Hite Beer Bomb】(港幣 $78)

鍾意飲酒嘅朋友,叫左個韓國人氣啤酒 Hite 嘅深水炸彈飲品,將成隻燒酒杯扔入去啤酒杯內,
「咋」一聲湧出一陣氣泡,將兩隻酒混合,酒味更加香醇之餘,仲有得睇有得玩,夠晒過癮。

—————————————
Sodam Chicken
地址:香港銅鑼灣耀華街 3 號百樂中心 7 樓


發表迴響