〈大嶼山〉迪士尼反斗奇兵大本營 Toy Story Land 試玩記

0

香港迪士尼樂園「反斗奇兵大本營」即將於今年 11 月 18 日正式開放!呢幾日都開放俾不同人士試玩,今日係演藝人員反斗夜 Cast Family Fun Night 有幸得到晌入面工作嘅朋友邀請一齊去玩 \^o^/

設計仿照 Andy 安仔嘅後花園,去到入口就見到個好高好高嘅胡迪!場內所有玩具、擺設,包括頭上照明嘅都係放大版嘅聖誕裝飾小燈泡!個人好似縮細左咁,去左大人國玩,場內分別有三個機動遊戲:「玩具兵團跳降傘」、「沖天遙控車」、「轉轉彈弓狗」,晌迪士尼玩到咁刺激嘅機動遊戲,真係完全估佢唔到,感覺好新奇!

「玩具兵團跳降傘 Toy Soldier Parachute Drop」
好似跳樓機,上升到空中再突然下跌,呢個我唔玩得,睇住兩個朋友玩到喊晒咁尖叫 XD


「轉轉彈弓狗 Slinky Dog Spin」
原本望落覺得佢駛得好慢,俾小朋友玩,諗住玩完咁刺激嘅降落傘之後冷靜一下,點知坐上去之後,架車都開得幾快…仲會不其然全部人篩埋左一邊,壓死我啦喂 XD 每次啟動前彈弓狗都會汪汪吠兩聲,好可愛架!排隊位置係原本裝住彈弓狗嘅大紙盒,牆身連天花板都有懷舊繪畫,仲有玩具砌法說明書!

「沖天遙控車 RC Racer」
呢個真係忍唔住要話佢痴線架!好刺激!U 型軌道,超高速垂直上落!架車來回幾次,都未回神又向相反方向衝過!仲要前面冇扶手拉住撐住,冇得卸力,背脊落果下都還好,正面望住自己垂直衝落去果下離心力大到呢,嚇到玩完果時頭暈腳軟起唔到身呀 T_T



肚餓可以去到翠絲小食店~ 裡面雪糕筒型薄餅、大大塊曲奇餅、鮮果杯同埋 Frozen Yogurt (有好多配料揀呀)
全部都係廿幾蚊,都幾抵食!


連廁所都係 Scrabble + 積木砌成!場內仲有唔少懷舊玩具做擺設!場內仲有抱抱龍同埋唔少其他玩具(唔記得影相 T^T)仲有真人扮演嘅胡迪同翠絲同大家影相!

今次迪士尼全新「反斗奇兵大本營」園區真係比想像中更新奇有趣更吸引呀!極力推薦~ 大家一定要黎試下呀!


發表迴響