〈灣仔〉(已結業)Yuyu Sushi 新鮮刺身串燒‧新鮮好味多選擇‧只是太貴

0

早前幾位朋友約嚟 YUYU Sushi 食晚飯,我先知道原來灣仔船街有唔少食店 =P
據佢哋講呢度啲刺身好新鮮,除刺身壽司外,仲有串燒食,有好多選擇。
當晚八點半左右到達,門口都企咗唔少人等位,等咗廿分鐘左右就入得去,算快。
店舖裝潢以黑色為主,環境幾清靜,但座位就唔算好闊落,坐得剛剛好咁啦。
當晚都有兩枱日本人嚟食飯,亦有幾枱似係附近剛放工嘅歐美人客。


大家好快就落咗超多嘢食,店員首先捧來兩大盤壽司,超豐富呀!
睇得出師傅有用心,賣相好而且份量唔慳家。

赤貝外層爽脆,內層軟滑,但係就略欠應有嘅甘甜同鮮味,不過不失。
八爪魚新鮮彈牙有嚼勁,唔似坊間通常食到軟淋淋有雪藏水味,實屬新鮮。
珍寶帆立貝壽司 ($48/2件) 隻帆立貝超大件!肥大肉厚,敗筆係有點苦,新鮮度爭啲。

至於油甘魚壽司($36/2件),呢度啲油甘魚好靚。
其實我好耐冇食過油甘魚,因為坊間食到嘅,通常都冇魚味又容易腥,
但呢碟似乎選用近腩肉位置,夠晒肥美,食落好重魚油香味,魚油多到令立立!
師傅刀功又到位,筋紋短,厚薄剛好,留到頂部帶紅位置嘅煙韌肉質同咬感,
又保留到其他部位嘅鬆軟嫩滑感,入口即溶,非常抵讚。

海膽軍艦都好新鮮,完全冇腥冇澀味,上面舖有兩層海膽,絕對比坊間足料得多。
外層嘅紫菜仲係脆卜卜架!

大蔥吞拿魚腩軍艦 ($45/2件),我對吞拿魚刺身片好感度唔高,反而較鍾意魚腩蓉,
但呢度嘅吞拿魚唔夠肥美,仲有太多肉筋,切得又唔夠碎,冇乜魚油出到嚟,
仲要被過多芝麻蓋過晒啲魚味,唔掂。

雖然我唔太食得鵝肝,但望到同聞到勁香都忍唔住試咗半啖。
呢度嘅鵝肝外層煎到脆脆哋,咬落去滿口油香,入口即溶,又唔會太油膩,讚。

鰻魚有點煙韌,係除咗醬汁甜味之外冇乜其他味,整體上冇乜特別。

食完壽司刺身就輪到熱食。串燒牛舌 ($39/3串) 微微燒焦剛剛好,有嚼勁又香口。
鹽燒雞翼雞油味好香,鹹度適中,皮脆,肉汁又鎖晒喺入面,好味。

牛肋骨肥咗少少,但牛肉味超香。至於金菇牛肉卷,雖然金菇夠爽口唔痴牙,
但明顯用水煮過,冇吸收到牛肉嘅油同肉汁,牛肉好味但金菇又濕又淡,麻麻地。

雞軟骨燒到好乾身,煙韌又唔太硬,仲帶有少少肉,面層灑咗香料好惹味。

個人認為炸墨魚嘴層炸粉太厚,唔夠爽,亦唔夠香口,但同行友人覺得超好味,
始終唔係周圍都食到嘅嘢食…都可以俾個機會佢嘅…

最後我哋九個人埋單總共 HK$3xxx,雖然 Overall 嘢食幾好,但都係覺得好貴。

—————————————

YUYU Sushi
地址:灣仔船街 3 號地下

發表迴響