Carlsberg 嘉士伯 Where’s The Party 神秘派對

0

大家可能早就喺街頭或地鐵站見過有陳冠希 Edison 嘅嘉士伯 Where’s The Party 廣告,
無地點無細節,譽為香港最神秘嘅派對。早前驚喜地收到入場邀請卡,決定嚟襯個熱鬧。

去到集合地點觀塘碼頭,排咗勁耐隊入場,都係為咗喺呢個 Backdrop 下影返張相。
只係知道大會話有交通安排會接載賓客到目的地,所以都仲未知道入面有乜嘢。

檢查完邀請卡,就要經過呢條長長嘅走廊,繼續排隊等入觀塘碼頭裡面。

係就係準備好…不過由興奮到謝晒,點解?因為成條通道堅熱…未開始就已經出晒汗啦。

入到封咗半個觀塘碼頭而成嘅等候區,拎咗手帶,仲要查身份證先入得嚟。
場內塞滿晒人…冇開風扇,冇冷氣,通風地方全部圍晒黑布…熱到呢…

有著住迷你裙嘅靚靚啤酒女郎招待,嘉士伯啤酒任飲,點都要拎返支嚟降降溫先。

場內仲有小食招待,飲酒前有小食落肚,夠晒細心。

嘉士伯啤酒個樽超靚,場內仲有個超巨型嘉士伯啤酒樽俾大家攬住佢影相。

又焗又熱又迫人…排隊出返去,竟然仲有人喺度當場噴油…我滿頭大汗,頭又暈又作嘔…

幾經辛苦上到旅遊巴,竟然神秘到要戴眼罩,除咗唔俾大家知目的地外,仲有玩遊戲。
聽到放咗幾多個銀落個桶裡面,最快而又答得中,就可以得到一個扭蛋用嘅金幣。
其實戴唔戴眼罩都睇唔到幾多個銀,同係咪最快舉手都睇唔到架啦…同車有人玩到嬲…

搭咗五分鐘車,由觀塘碼頭搭咗去觀塘開源道附近某工廈,呢程車真係好鬼嘥氣…

上到去,好似 War Game 場,又係勁多人噴油,亦備有油漆筆,人人都可以畫圖寫字。


場內有幾個遊戲玩,戴眼罩搵嘉士伯啤酒樽,同埋經典推啤酒遊戲,可以賺扭蛋金幣。
但係…冇工作人員在場,又冇指示,冇道具,其實即係冇得玩。

六部扭蛋機壞五部,淨返果部都要工作人員手足無惜努力修理,難怪排九個字都未扭到…
終於排到隊頭,都要花咗十幾分鐘先又拍又用蠻力先扭到隻蛋…明顯,我好燥底…
其中幾隻扭蛋係有參加抽獎表格,最後抽獎得獎者可以贏得四人歐洲之旅機票住宿。
抽唔中參加表格,都仲有膠珍珠頸鍊、螢光棒、閃燈手厄、閃光戒指等等紀念品嘅。

場內嘉士伯啤酒任飲,特別要求亦會有嘉士伯 Chill 同埋樽裝清水可以揀。
大會仲安排咗五個赤裸上身嘅猛男,揹住啤酒連管,將啤酒噴射到你口中…
不過因為有人喺台上四圍噴,我個身同對手都濕晒 >_<(我相信好多部電話中晒招)

現場越來越迫人~行都行唔郁,氣氛開始熱鬧,但冷氣就唔多夠。
廁所長期排咗廿幾三十人…望到即刻唔敢再飲嘢…點搞呢…

DJ 播咗一輪音樂之後,呆等一個鐘終於到 RX 黃浩邦 Beatbox 表演,Warm Up 吓個場。

然後有廿四味演出,但係人聲細聲到我聽唔到佢哋唱乜…(灰)

然後鄭融突然加入,當主持講起佢曬小蠻腰時我即時諗起佢張肚腩相…真為佢抹一額汗…

呆等咗超過成個半鐘,先到陳冠希同 MC 仁表演,其實 Edison 當日表現真係有夠 Hea…
加上人聲完全唔入咪,聽唔清楚…雖然MC 仁唱得不錯,但唱咗兩首我就悶到走咗了…

其實呢個派對本身係幾好玩,幾令人興奮嘅,只係時間安排得好差,
成個活動五個鐘頭裡面,呆等嘅時間足足有三個幾鐘…如果唔係成日玩開嘅真係會幾攰。
但好佩服現場有班後生仔女,喪玩喪跳喪飲五個鐘後,仲可以勁 High 玩得勁開心架…

雖然我都仲係廿幾歲…但我諗,我老喇。(冇氣)

發表迴響